Bocah mBeling

Kedadeyan iki tak alami nalika aku isih umur limang taun. Wektu kuwi aku bali saka sekolah kira-kira jam 10 esuk. Bali saka sekolah aku langsung ganti klambi. Sawise ganti klambi aku langsung dolanan pasaran ning ngarep omah. Pas aku lagi pasaran, aku weruh simbah kakung lagi ngedhuk blumbang. Simbah kakung iki garwane adhine simbah putri ku, dadine ora saomah karo aku. Aku langsung nyedhaki simbah, terus takon arep dinggo ngapa blumbang kuwi. Simbah kakung ngandhani nek blumbang kuwi arep dinggo wadhah sampah, banjur nek wes kebak, blumbange diurugi maneh. Jerone blumbang kira-kira siji setengah meter. Aku langsung medhun, melu ngewangi simbah ngedhuk blumbang kuwi. Satenane aku ora pengen ngewangi nanging aku mung pengen dolanan lemah. Serok sing dinggo ngangkat lemah tak nggo dolanan, tak tancep-tancepke ning lemah. Tujuanku mung pengen supaya blumbange tambah jembar ora malah tambah jero. Ngerti nek mung tak nggo dolanan, aku diseneni simbah, banjur dikon munggah. Aku tetep ngeyel wegah munggah, banjur lungguh dheprok ning lemah. Saking jengkele, simbah munggah ninggal aku ning jero blumbang. Ditinggal simbah lunga, aku bengak bengok njaluk tulung supaya diangkat metu. Ora ana sing nulungi, aku nyoba munggah dhewe. Lagi salompatan, lemah sing tak goceki ambles, terus aku tiba dheprok. Bokongku lara banget amarga sing tiba bokongku dhisik.

Ngerti nek aku kangelan munggah, simbah ngangkat aku munggah. Sawise isa metu, aku langsung wisuh terus maem. Sawise maem aku turu awan. Wektu turu awan, jebule udan deres banget. Wektu aku tangi turu, udane isih deres tapi ora deres banget. Aku penasaran kaya ngapa bentuke blumbang sing tak kedhuk mau. Pas banget, ning ngarep omah ana payung, aku langsung jupuk payunge banjur niliki. Aku ora ngerti ning ngendi pas e blumbang mau amarga plataran omahku banjir. Pas aku mlaku alon-alon, ndilalah blumbange kuwi ning ngarepku persis. Aku kejlungup mlebu ning blumbang sing kebak banyu. Aku glagepen amarga aku ora isa nglangi. Aku bengak bengok jaluk tulung, tapi ora ana sing krungu, amarga swaraku kalah karo swarane udan. Untunge pakdheku metu lungguhan ning lincak ngarep omah. Pas arep lungguh, pakdhe ku weruh ana payung ngambang ning plataran omah. Pakdhe ku nginguk ning ruang tamu niliki aku isih turu apa wis tangi. Delok nek aku wis ora ana, pakdhe ku langsung mlayu marani payung mau. Tanganku sing ngranggeh-ngranggeh, dicekel karo pakdhe ku. Aku terus dibopong didelehke ning jero omah. Lambe ku wis biru, lan raiku wis pucet. Krungu ana rame-rame, simbah putri karo ibuku metu niliki. Delok kahanan ku kaya ngono, simbahku banjur jupuk andhuk terus nggaweke teh panas. Andhuk disampirke ning awak lan sirahku, banjur aku dikon ngombe teh panas karo guluku dipijeti simbah supaya banyu sing keombe metu kabeh. Wektu kuwi rasane aku arep nangis, nanging ora isa amarga aku kadhemen. Bareng awakku wis ora teles lan ora kadhemen maneh, aku didusi nganggo banyu anget. Sawise kuwi aku dikon teturon ben awake anget maneh. Aku tetep ora kapok niliki blumbang kuwi mau saben bar udan deres. Kedadeyan iku malah nggawe aku luwih ati-ati nek arep niliki blumbang sing ora ketok amarga kebak banyu.

Cerkak

Cerkak menika singkatan saking cerita cekak. Cerkak menika cerita ingkang ngangge basa Jawi. Cerkak menika saged cerita ingkang ngemot cerita pengalaman urip saha ugi saged cerita ingkang fiksi utawi dipunarang piyambak.

Pawartos Dinten Menika

Indonesia pikantuk juara umum wonten ASEAN PARAGAMES IX. Atlet Indonesia saged pikantuk 126 medali emas, 75 perak, saha 50 perunggu. Prestasi menika munjuli saking targetipun ingkang namung 107 medali emas. Atlet-atlet menika inggih pikantuk bonus kados atlet-atlet liyanipun.


Pawartos saking Koran Kedaulatan Rakyat 25/09/2017

Becak

Becak menika piranti transportasi ingkang biasanipun gadhah 3 rodha. Wonten Jakarta taun 1980, becak mboten pareng dipunginakaken amargi damel ribeting dalan. Jinising becak menika wonten bejak ingkang dipungenjot saha becak motor. Wonten DIY becak motor mboten pareng dipunginakaken amargi saged nambah polusi udara.

Resensi Serat Pakeliran Jangkep Lampahan Parta Krama

Panyusun : Ki Purwadi

Penerbit : CV. Cendrawasih

Taun Terbit : 2001

Cacahing Kaca : 136

Serat Pakeliran Jangkep Lamphan Parta Krama menika samakipun ngangge kertas ingkang bahaipun radi tipis saengga kertas menika gampil suwek. Wernanipun sampul ugi gampil ilang (pudhar). Bukunipun dipunjilid ngangge teknik pengeleman.

Buku menika nyariosaken babagan Prabu Baladewa ingkang kepanggih Prabu Kresna ing Dwarawati. Kekalihipung ngrembag babagan kramanipun Sumbadra. Prabu Kresna pengen bilih Sumbadra krama kaliyan Arjuna, ananging Prabu Baladewa pengen bilih Sumbadra kedah krama kaliyan Burisrawa. Prabu Kresna ngemutaken Prabu Baladewa bilih dhaupipun temanten kedah mawi bebana rerenggan kembar mayang parijatha, kayu kalpataru dewandaru jayandaru ing kaswargan. Pangaraking temanten nitih kreta kencana, pangarih widadara lan widadari, kinurmatan ungeling gangsa lokananta ingkang munya ing ngawang-awang panabuh para Jawanta, saha mawi srah-srahan maesa andanu ules pancal panggung cacah satus kawandasa.

Paraga lampahan menika wonten Prabu Kresna, Prabu Baladewa, Punakawan, Arjuna, Puntadewa, Werkudara, Duryudana, Sengkuni, Prabu Bisawarna, lan sak piturutipun. Lampahan menika ugi ngangge alur maju.

Buku menika saged dipuntumbas kanthi regi Rp17.000,00. Miturut kula, regi semanten sampun pas kaliyan isinipun saha wujudipun buku menika. Kaluwihan saking buku menika, nyariosaken babagan Arjuna ingkang badhe krama kaliyan Sumbadra. Nanging wonten buku menika mboten dipuncariyosaken lampahan Arjuna krama kaliyan Sumbadra.

Saran saking kula, menawi damel buku, saenipun ngangge kertas hvs pethak, ampun ngangge kertas burem, amargi kertas burem menika ndadosaken tingalan gampang pedhes saha pamaos ugi gampil kraos ngantuk.

Mugi-mugi resensi menika saged migunani saha bilih wonten basa ingkang kirang trep saha ingkang salah kula nyuwun pangapunten. Maturnuwun.

Ngayogyakarta

Saiki mobil lan motor dadi getihmu
Gedung magrong-magrong gegermu
Kebul sek dadi megamu
Sawah sing ijo royo-royo
Ganti dadi omah mewah
Panggone wong sing linuwih
Arep nganti kapan kahanan iki?

Gedongkiwo

Gedongkiwo menika salah satunggaling kelurahan ing Ngayogyakarta, saha Gedongkiwo menika celak kaliyan Kabupaten Bantul. Gedongkiwo menika salah satunggaling kelurahan ing kecamatan Mantrijeron.

Ora Ngerti

Tekamu ora iso tak ngerteni
Embuh esuk embuh awan embuh wengi
Kaya maling sek arep njarah omah
Bisaku namung cepak-cepak
Supaya nalika wektune wus cepak
Aku wus siyaga

Resensi Buku "Serat Kidungan Kawedhar"

Tema Buku : Sastra Jawi
Judul Buku : Serat Kidungan Kawedhar
Penerbit : Proyek Penerbitan Buku Sastra Indonesia dan Daerah
Taun Terbit : 1979
Kitha Terbit : Jakarta
Kandelipun Buku : 170 kaca
Panganggit : R. Wiryapanitra

Serat kidungan menika anggitanipun suwargi Kanjeng Sunan Kalijaga. Isinipun inggih menika amengku kawruh pujiyan utawi kawruh padhukunan ingkang kapendhetaken saking daya pakartining gaib. Buku menika kaperang dados 2 versi, kaca 7-98 kidungipun dipunserat mawi basa Jawi lajeng dipunandharaken mawi basa Indonesia. Kaca 101 dumugi pungkasan, sedaya tetembungan dipunserat mawi basa Jawi.

Buku menika ugi ngandharaken lelampahan utawi tindak tanduk ingkang kedah dipunlampahi supados nggadhahi gesang ingkang tentrem saha saha lir saking sedaya kacilakan. Buku menika trep kangge tiyang ingkang mboten saged basa Jawi ananging nggadahi pepengenan kangge nyinauni kidungan anggitanipun suwargi Kanjeng Sunan Kalijaga. Buku menika ugi trep kangge tiyang ingkang badhe sinau babagan tata basa saha tata makna ingkang gayut kaliyan kidungan. Kekirangan saking buku menika, inggih menika bukunipun sampun mboten dipuncetak malih, saengga buku menika namung wonten sekedhik ing perpustakaan utawi ing toko buku, saha tampilan sampul buku menika kirang menarik.

Mekaten resensi buku "Serat Kidungan Kawedhar" saking kula. Wonten lepat utawi basa ingkang kirang trep, kula nyuwun pangapunten. Maturnuwun.