Gambuh

Sekar gambuh ping catur
Kang cinatur polah kang kalantur
Tanpa tutur katula tula katali
Kadaluwarsa katutuh
Kapatuh pan dadi awon

Aja nganti kebanjur
Sabarang polah kang nora jujur
Yen kebanjur sayekti kojur tan becik
Becik ngupayaa iku
Ing pitutur kang sayektos

Tutur bener puniku
Sayektine apantes tiniru
Nadyan metu saking wong sudra papeki
Lamun becik nggone muruk
Iku pantes sira anggo

Ana pocapanipun
Adiguna adigang adigung
Pan adigang kidang adigung pan esthi
Adiguna ula iku
Telu pisan mati sampyah

Si kidang umbagipun
Ngandelaken kebat lompatipun
Pan si gajah ngandelaken ageng inggil
Ula ngandelaken iku
Mandine kalamun nyakot

(Serat Wulangreh, Sinuwun Paku Buwana IV)